據 Italian Report 報導，今季於意甲衝擊祖雲達斯霸權嘅國際米蘭有意於一月引入伊巴謙莫域，呂布有望重返意大利球壇。
伊巴雖然已經38歲，但仍然寶刀未老。今季於美職聯上陣29場交出30個入球、7個助攻，場均超過一球數據仍然非常誇張。雖然 MLS 水平遠比意甲低，但驚人數據仍然可引證伊巴目前仍然可交出高水平表現。
目前伊巴謙莫域與洛杉磯銀河嘅合約將於明年一月到期，屆時伊巴若不退役就需要尋找一支新球隊落班，故依照時間性嚟講此宗交易絕對可行。
對國米而言，於干地嘅352陣式下球隊多線作戰至少需要四名前鋒作輪換。隨住山齊士早前代表智利時受傷需養傷三個月，目前國際米蘭只有盧卡古及拿達路馬天尼斯兩位有實力嘅一隊鋒將可用，於一月引入新進攻球員可算為必須嘅工作。於目前球壇轉會費高昂年代，若可免費引入伊巴亦確為精明選擇。
伊巴於2006年時正正就係由祖雲達斯轉投國際米蘭，並於發光發熱下被巴塞於2009年挖角。效力國米期間，伊巴謙莫域共為球隊上陣117場，交出66入球、30個助攻，差不多每場都有入球或助攻貢獻。
