荷蘭前鋒雲佩斯早前宣布今個球季後就會正式退出球壇。不知不覺，今天晚上對付海牙一戰就已經係佢職業球員生涯最後一戰。
據飛燕諾官方消息，雲佩斯將於今晚對海牙嘅比賽後告別球壇。教練雲邦賀斯指「非常感謝雲佩斯。過去兩星期我們都係度準備呢場比賽，雲佩斯非常享受對海牙一戰，佢將會以一個圓滿嘅方式結束球員生涯，成最好嘅結局。」
35歲嘅雲佩斯現時效力嘅飛燕諾正正就係其出道嘅球隊，之後轉投阿仙奴開始揚名，於12/13球季轉投曼聯後就馬上為球隊奪得英超冠軍。個人亦曾兩奪英超金靴獎、一次英超年度最佳球員及多次入選最佳陣容，被譽為近代最佳前鋒之一。
雲佩斯為阿仙奴共上陣194場攻入96球，為曼聯上陣嘅賽事則有86場共攻入48球。此外雲佩斯亦為荷蘭上陣102場攻入50球，為國家隊入球王。當中最為人津津樂道自然係2014年世盃對陣西班牙一記魚躍式頭鎚，為近年世盃其中一個最難忘畫面之一。
