Sky Sports News 透露，熱刺已與里昂達成協議，將以破球會記錄價6500萬磅簽入中場尼當比利。
報導指該現時22歲嘅法國國腳將會與熱刺簽署五年合約，本周就會正式進行體檢。
尼當比利於2017年由艾米恩斯租借至里昂，並於去年獲里昂以800萬歐元轉會費完成收購。里昂方面非常重視呢位希望之星，並視為球隊未來之發展核心，並於去年9月與其續約至2023年。
尼當比利於法甲表現出色，為現今球壇少見嘅高效Box-to-Box中場，與熱刺嘅風格非常相似。呢位防守中場除咗速度快外，攔截硬朗亦非常硬朗，擅於全場壓迫。此外，尼當比利亦於近季表現出其優秀身體質素及護球技術，故於今夏獲得非常多豪門嘅注視。
熱刺去夏並未收購任何球員下表現出色，除於英超殺入前四外，亦神奇地殺進歐聯決賽，可惜敗予利物浦只能獨得亞軍。於今個轉會窗上，熱刺目前有極大機會失去中場核心艾歷臣而換來一筆可觀轉會費，故用一定嘅資金去收購一位具能力中場亦屬必要。
尼當比利有「新馬基利尼」之稱，今季為里昂上陣47次並交出2入球8助攻，並交出場均2.6次攔截嘅良眼數據。除熱刺外，曼城、祖雲達斯、利物浦、皇馬等豪門都被指對呢位法國中場有意，大家可以觀望熱刺會否正式完事並於今周官宣。
