近日「銀河艦隊」與阿仙奴進行友賽，雖然最後於十二碼擊敗對手，但付出代價為球隊翼鋒阿辛斯奧受到重創，或需休賽一季，但此卻可能成為久保建英上位嘅機會。
皇家馬德里於6月份以200萬歐元由FC東京羅致有「日本美斯」之稱嘅久保建英。呢位只有十八歲嘅日本小將雖然年紀輕輕，但其才華及技術都非常出眾，故加盟皇馬後都一直跟隨一隊操練。
久保建英其實曾經於皇馬死敵巴塞嘅拉馬西亞青訓營效力達4年之久，可惜之後因巴塞被控簽入未成年球員而需重返日職FC東京，直至六月時滿18歲才可重返歐洲球壇。皇馬雖然最後成功以低價購入，但原來當時久保建英亦有如PSG及曼城等等嘅追求者。
久保建英跟隨皇馬一隊訓練一直備受好評，唔少隊友都對呢位年輕嘅進攻中場稱讚有加，加上其純熟嘅西班牙語言能力亦令佢更快速融入球隊。
據悉皇馬目前已下定決心清走如巴爾、占士等被定位為「不需要」嘅球員，而球隊本身亦有如雲尼斯奧斯、巴謙戴亞斯及新加盟嘅洛迪高可頂替阿辛斯奧位置。不過若久保建英持續表現良好嘅話，唔少球評家都認為皇馬好有機會直接將呢位年輕小將升上一隊進行註冊，以填補阿辛斯奧嘅註冊位置。
