據 Sky Sports News 報導，本月底合約到期嘅馬達將與曼聯完成續約，來季繼續效力球隊。
隨住靴里拉與華倫西亞自由離隊後，球會已專注與隊內球員商討續約問題，以免再人財兩失。曼聯早前已公佈一份今季離隊名單，當中並不包括馬達。
於續約問題上，馬達算係較為低調嘅一位。其他兩年合約到期嘅球員，例如迪基亞、拉舒福特等都曾被傳媒報導出因不滿山齊士薪金太高而要求大幅加薪，至今仍然未有續約消息。
今日Sky Sports 直指馬達與曼聯談判結果已經接近完成，但並未透露細節及時限。而據 Mirror 早前報導，馬達將與球會簽署一份一年年期，並可延長一年嘅合約。相信是次馬達留隊算係曼聯球迷近期嘅少數好消息。
