據 Football Italia 報導，曼聯願意以8000萬歐元求購拉素中場米連高域沙域，以頂替有機會離隊嘅普巴。
雖然普巴有如期跟隨曼聯到澳洲進行操練，而領隊蘇斯克查又稱該法國中場「非常專業，沒為球隊帶來問題」，但其實不論外國媒體或曼聯球迷都知道普巴已經無心再為紅魔效力。
現時普巴嘅潛在買家包括皇家馬德里及祖雲達斯兩家豪門。由於曼聯為普巴嘅標價高達1.5億歐元以上，故兩隊都希望通過將球員加入交易以減少支出，當中曾被傳成為交易對象嘅包括巴爾、伊斯高、戴巴拿等等巨星，相信目前最大問題還是曼聯是否堅持要錢唔要人。
就米連高域沙域轉會一事，外媒消息就指目前尚未進行正式報價，但曼聯已經與拉素接觸並表示願意為呢位塞爾維亞中場支付8000萬歐元作求購之用。
除曼聯外，據悉巴黎聖日耳門亦對24歲嘅「白普巴」感到興趣，但目前相比下曼聯仍然佔有優勢。
於中場具有非常全面能力嘅沙域為塞爾維亞籍球員，上年為拉素於意甲上陣31場交出5入球、3助攻。上年轉會窗時已有指紅魔有意將佢收歸其下，但當時沙域身價高達1.2億歐元故最後並沒成事。
與其留住一位無心踢又問題多嘅球員，曼聯用普巴去換一位高質素球員再用餘下獲得嘅資金去購買沙域或許是一個更好嘅選擇。
