西班牙媒體阿斯報AS透露，由於沙拿於利物浦奪冠後之言談，皇家馬德里或會於今夏向利記求購呢位埃及前鋒。
沙拿目前與利物浦合約至2023年方會到期，但日前於決賽後受訪嘅說話就令人懷疑佢有離隊嘅可能。「埃及美斯」於利物浦成功捧走第六次歐聯後受訪，被問到自己未來去向時並沒示忠留隊，反而回答「目前並不想談論未來去向。」令人不禁懷疑沙拿有出走嘅想法。
此言論一出，AS就指皇馬已經開始籌備收購沙拿一事。據 transfermarkt 估值沙拿目前身價約為1.5億歐元，若要利記開綠燈放人銀河艦隊則至少要出價2億歐元以上，對盛傳已經花費鉅額簽入夏薩特及盧卡祖域嘅皇馬嚟講絕對會令財政壓力大增。
AS又補充，沙拿與教練高普之間存有問題，今夏離隊絕非不可能嘅事。除皇家馬德里外，德甲勁旅拜仁及死敵曼聯都被指對沙拿有興趣。
早前拉莫斯先公開宣佈會繼續留隊，若最後皇馬真正簽入沙拿，兩大冤家碰頭都可算係話題性十足。
