法國媒體 RMC Sport 透露，巴塞隆拿頭號人物美斯極力反對基沙文今夏加盟。
基沙文五月正式宣佈今夏將會正式離開馬德里體育會，而外界一直有傳呢位法國國腳已經於巴塞達成協議。不過近日 RMC Sport 就指美斯極力反對呢宗交易，因為佢認為基沙文曾經於去年夏天戲弄巴塞。
去年夏天，巴塞曾極力邀請基沙文來投，但遭到基沙文拒絕，並隨即宣佈會效忠馬體會。據報除美斯外，巴塞更衣室內亦對基沙文加盟表示反對，而球迷普遍亦不支持基沙文轉投球會。
相對於基沙文，報導指美斯更希望早前離隊嘅尼馬回歸球隊。除咗因為美斯與尼馬關係較好外，呢位頭號球星認為尼馬回歸更有助巴塞隆拿之進步。據報巴塞亦曾向PSG查詢簽入尼馬之可行性，但巴黎已向巴塞表示尼馬今夏仍然為球隊非賣品，除非巴塞願意放棄丹比利、古天奴及拉傑迪作交易一部分，否則該巴西巨星回歸之可能性極低。
美斯於巴塞地位舉重輕重，若強烈反對相信球隊都會給予尊重。踏入7月份後，基沙文於馬體會嘅違約金將會降至1.2億歐元，若最後巴塞決定不作收購嘅話，相信如曼聯、祖雲達斯等曾與基沙文有傳聞嘅球會或會考慮出手。
