西班牙傳媒 AS 近日為皇馬近十個賽季教練勝率作出統計，結果回歸後嘅施丹排行尾二，只比排行第尾嘅盧柏迪古稍優。
於施丹首次執教皇馬嘅時候，除咗為銀河艦隊於歐聯稱皇稱霸外，所執教嘅96場比賽勝出68場，勝率達70%，於排行榜中位列第四位。
而施丹回歸後球隊明顯有所下滑，上仗爆冷以1:0被馬略卡擊敗更令其勝率再下降。回歸後嘅施丹現時共帶隊20場，當中只有10場贏波，勝率只有50％，對皇馬呢支豪門嚟講可算是不能接受。
不過低處未算低，盧柏迪古比起施丹更差。呢位西班牙教頭於銀河艦隊雖然只曾執教十場，但當中只有四場勝仗，40%勝率難怪早早被辭退。
排名第一嘅為柏歷堅尼，執教期間共帶隊38場比賽，當中有31場都贏波而回，勝率高達81.58%，與回歸版施丹相比相差極大。
至於早前盛傳待施丹被炒後就會回歸嘅摩連奴就於是次排行榜中居於次席。呢位葡萄牙教頭執教銀河艦隊其間114場比賽勝出87場，勝率亦高達76.32%。
皇家馬德里今夏雖大手重建，但陣容老化加上傷兵滿營下今季表現亦難以令人滿意。若施丹於短期內未能改善球隊表現，相信未來或有機會挑戰盧柏迪古嘅榜尾席位。
