皇馬就巴爾去留問題終於有定案，教練施丹親口證實巴爾即將離隊，24-48小時內就有定案。
「銀河艦隊」今晨於友誼賽對上拜仁，最後以1:3落敗。今場雖然為夏薩特、盧卡祖域等嘅地標戰，但焦點卻落在未獲派上陣嘅巴爾身上。
早前有指巴爾決意留隊，並希望於季前賽盡力證明自己以贏取施丹信任，可惜未開賽就傳來巴爾被球迷柴台，拒絕為球迷簽名等消息，而施丹於友賽拜仁後嘅記者會更直接為呢位威爾斯球星判處死刑。
比賽過後，施丹出席記者會時被問及巴爾沒進大名單原因時表示:「巴爾沒有進入大名單原因？因為佢即將離隊。球隊希望佢可以離開，呢個係對各方面最好嘅決定。我們目前正努力處理巴爾嘅轉會。」
「我與球員之間沒任何問題，但有時候有些事情必須去做。我作為教練必須去做決定，有些事情需要改變。今次決定為我所做，但球員自身都了解情況。事情好快就會有結果，我唔肯定於24小時或48小時內會發生，但相信事情發展會係對各人都最好。」施丹補充。
30歲嘅巴爾雖然多次於決賽有超水準發揮，但其易傷體質一直未能助皇馬奪得更好成績，於C朗離隊後情況更愈見嚴重。上季巴爾共為皇家馬德里於西甲上陣29場賽事(8場後備)，交出8個入球、3個助攻。
目前外媒透露今早皇馬友賽對手拜仁為最接近簽入巴爾嘅球隊，該德甲豪門自洛賓、列貝利離隊後一直急於尋找替代品，先後追逐車路士嘅赫臣奧度爾及曼城嘅尼萊辛尼都未能得手。
而拜仁中場於受訪時被問到巴爾有機會來投一事，更直指所有頂級球員都會受到歡迎。
除拜仁外，英超雙雄曼聯、熱刺都被指對巴爾有意思，最後結果相信好快會有定論。
