歐聯昨夜上演分組賽焦點賽事，巴黎聖日耳門於主場迎戰皇家馬德里，結果「銀河艦隊」慘吞三蛋，出師不利。
今仗皇馬排出強陣應敵，鋒線上擺出巴爾、夏薩特、賓施馬嘅「BBH」組合，中場則有卻奧斯、占士供應彈藥，道理上攻力應該是非常恐怖，本應令人期待。
相反巴黎於進攻上可算係殘陣出戰，正選三箭頭尼馬、麥巴比、卡雲尼都未能上陣，改以新兵伊卡迪、迪馬利亞、沙拉比亞攻堅，於比賽前明顯被比下去。
不過所謂「殘與強」嘅陣容似乎與戰果並不相符，巴黎於比賽中憑「銀河艦隊」舊將迪馬利亞梅開二度，加上右閘梅利亞攻入一球，以三球輕取皇馬，而整場比賽皇馬亦明顯受壓。
另一邊廂，開季前令球迷期待萬分嘅皇馬新三叉戟表現卻令人不敢苟同。巴爾、賓施馬雖然都先後取得入球，但分別因手球、越位被取消，結果皇馬整場錄得「零中龍」嘅尷尬數據，為03/04歐聯賽季後首次出現。
除進攻不滯外，皇馬嘅後防亦明顯出現問題。於拉莫斯未能出戰下，皇馬今仗以華拉尼配上新兵米列圖擔正，但明顯未能有效阻擋對方進攻，多次被PSG以小組打入禁區。更令人擔心嘅係，後防最後一道屏障古圖奧斯實在令人難以安心，迪馬利亞嘅第一球近柱被射入責無旁貸，而第二球遠射亦明顯可做得更多。值得留意嘅係，該名比利時門將於2月份後就未曾試過零封對手，令人不禁再一次質疑佩雷斯「棄拿保古」嘅決定。
皇家馬德里今夏大灑金錢重建，但看似仍未尋找到贏波嘅方程式，若再持續下去，相信施丹嘅帥位將出現暗湧。
