車路士球迷期待以久，球會昨日終於官方宣佈傳奇林柏特將會回歸帶領球隊，不過睇嚟外國就對林伯執掌唔太睇好。
博彩公司 Betfair 近日為下個球季「英超最快被炒領隊」開出賠率，結果呢位新帥與曼聯領隊蘇斯克查並列大熱門，同樣只得1賠6，而第三位則為白禮頓領隊樸達。
英國當地唔少言論都認為車仔於此時候邀請林伯回巢並非明智之選，因球隊除要面對轉會禁令外，陣中核心夏神亦於今夏離隊。雖然有傳言指車路士並無要求下季要殺入前四，但明顯地林柏特初期執掌或會面對勁大問題，要求一向都高嘅車迷或不收貨。
此外，該賠率同時亦列出最低機會被炒嘅領隊，曼城嘅哥迪奧拿及利物浦嘅高普賠率都同時為1賠100，大家都預計兩位名帥會繼續帶領兩支勁旅衝擊冠軍。
