英超不論於香港或是世界上都係最受矚目嘅聯賽，競爭激烈下效力英超嘅球員身價亦持續高企。最近外國網站 Transfermarkt 就盤點出現時估值身價最高嘅十位球員，不妨睇下同你心中所想有無分別啦！
10. 簡迪 N’Golo Kanté
年齡: 28
身價估值: 1億歐元
效力車路士嘅簡迪以1億歐元名列第十位，單單一句「海洋覆蓋地球七成表面，餘下三成由簡迪覆蓋」就足以證明呢位防守中場對任何一支球隊嚟講都係一道不可多得嘅屏障。
9. 普巴 Paul Pogba
年齡: 26
身價估值: 1億歐元
成名已久嘅普巴現時只有26歲，以天價重返曼聯後多季都未能如新援般奴費南迪斯一樣助球隊點石成金，屢屢傳出離隊傳聞下今夏或有機會轉投皇馬或祖雲達斯。
8. 班拿度施華 Bernardo Silva
年齡: 25
身價估值: 1億歐元
於哥帥帶領下近季發揮出色嘅班拿度施華亦獲估算身價達1億歐元。不過曼城今季表現低迷下班拿度施華亦只能於24場英超比賽中交出5入球、5助攻，目前似乎有價無市，暫時未有傳聞指有球隊對施華有意。
7. 尼萊辛尼 Leroy Sane
年齡: 24
身價估值: 1億歐元
施華隊友辛尼亦以1億歐元身價位列前十位。今季都處於受傷狀態下嘅辛尼仍未正式復出，不過去季神奇表現仍然令佢身價企穩一億歐元。目前德甲豪門拜仁似乎對呢位翼鋒最有興趣，不過去夏已因為其身價有所卻步。
6. 阿諾 Trent Alexander-Arnold
年齡: 21
身價估值: 1.1億歐元
利物浦嘅阿諾成為頭十名中最年輕及唯一嘅後防球員。去季助紅軍高舉歐聯嘅阿諾今季表現有過之而無不及，今季已經於英超交出高達12助攻，暫時助球隊穩固榜首，極有機會成為利物浦首奪英超嘅功臣之一。
5. 迪布尼 Kevin De Bruyne
年齡: 28
身價估值: 1.5億歐元
單看剛舉行嘅曼市打呲就知道迪布尼對藍月亮嘅重要性。呢位比利時中場成為今季曼城少數仍然發揮出色嘅球員，現時已為球隊於英超交出8入球、16助攻，早前亦助球隊於歐聯十六強首回合擊敗皇家馬德里，目前晉級形勢大好。
4. 沙迪奧文尼 Sadio Mané
年齡: 27
身價估值: 1.5億歐元
今季多次助紅軍攻入關鍵一球嘅文尼成為榜中第四名，14入球、7助攻嘅良眼成績表令利物浦於英超遙遙領先，亦係紅軍攻力嘅保證之一。
3. 沙拿 Mohamed Salah
年齡: 27
身價估值: 1.5億歐元
文尼嘅三叉戟拍擋沙拿亦同樣獲估值1.5億歐元身價。沙拿今季亦一如以往成為利物浦前場嘅入球核心，暫時於英超貢獻16個入球、6個助攻，與文尼可算是平分秋色。
2. 哈利簡尼 Harry Kane
年齡: 26
身價估值: 1.5億歐元
養傷中嘅簡尼成為榜中唯一嘅熱刺球員。於哈利簡尼缺陣下熱刺成績大受影響，今季球隊亦於歐聯十六強遭淘汰出局，近季都有傷病問題嘅簡尼早前更被傳媒指出有意離隊，而潛在嘅下家包括曼聯、皇馬等等，其英人身份相信亦為其身價企硬嘅原因之一。
1. 史達寧 Raheem Sterling
年齡: 25
身價估值: 1.6億歐元
當日球迷恥笑對象，今日成英超最高身價球員。雖然曼城未如去年般踢出令人恐懼嘅足球，但每次史達寧控球亦令對手感到極大威脅，此外再配合英格蘭國籍身份加上25歲兩個加分元素，令史達寧成為是次估值最高身價嘅英超球星。
相信今次十大英超最高身價球員榜都與大家心目中可能有所落差，雲迪克、艾利臣、費明奴都只能獲估值為第11-13名身價，大家又有何睇法？
