De Telegraaf 及 Marca 同時報導，銳意加強中場實力嘅皇馬已將最新目標鎖定為阿積士嘅雲迪碧克。
「銀河艦隊」經歷一個失敗賽季後今夏決心重組，已先後重金簽入夏薩特、盧卡祖域、費蘭文迪等前後場球星。中場位置方面雖有由拜仁結束外借嘅占士洛迪古斯暫時回歸，但高華錫、馬高斯路蘭迪、斯巴路斯等都相繼離隊，中場位置於重建上實力可算係有減無增。
最大問題是近日皇馬於熱身賽仍未能擺脫上季嘅頹勢，多場比賽都未能踢出具相應實力嘅球賽，更先後被馬體會大炒及於 Audi 盃被熱刺淘汰。唔少球迷都認為目前皇馬中場實力與早幾年相比已大不如前，當年黃金組合摩迪+卻奧斯嘅活力不足更是整隊球隊問題嘅核心。
整個轉會窗以來，皇馬都與曼聯嘅中場核心普巴傳上關係。據報曼聯管理層雖有意放走呢位「麻煩友」，但普巴獲蘇斯克查力保留隊，故於售價上一直未肯讓步，而今夏大肆收購嘅皇馬亦未能拿出紅魔鬼所叫嘅1.8億歐元高昂叫價。
由於價錢差距極大，有指「銀河艦隊」已放棄對普巴嘅收購，但替補人選卻非盛傳嘅艾歷臣。今日多間外媒都同時透露皇馬已經與阿積士進行接觸，希望可以簽入荷蘭中場雲迪碧克，以改善中場活力不足問題。
22歲嘅雲迪碧克上季表演出色，與迪列治、迪莊等一起帶領阿積士殺入歐聯四強，可惜最後不敵摩拉嘅帽子戲法慘遭淘汰。
雲迪碧克上季數據上相當唔錯，共為阿積士於荷甲上陣34場，交出9入球、10助攻，於歐聯上亦交出3入球2助攻，加上其樂意跑動嘅打法，以其5000－6000萬歐元嘅身價相信會比普巴更為皇馬球迷喜愛。
