早前有報導指皇馬隊長拉莫斯與會長佩雷斯不和尋求離隊，而近日佩雷斯受訪時就證實曾收到拉莫斯要求免費轉會轉投中超遭拒。
佩雷斯日前上電台 Onda Cero 時證實:「沙治奧拉莫斯與經理人最近有來到我辦公室，向我表示佢地收到來自中超嘅超優厚報價，要求球會俾佢免費離隊。」
「我同佢講呢樣野係無可能會發生。皇家馬德里無法承受球會隊長以免費方式離隊，呢樣會成為其他球員嘅壞先例。」佩雷斯補充。
拉莫斯自2005年以2700萬歐元由西維爾轉投銀河艦隊，至今已於球會14年，亦為球隊現任隊長。拉隊曾代表皇家馬德里奪走4屆西甲、2屆國王盃、4屆歐聯等等，一直為皇馬後防重心，亦曾多次入選世界足協/西甲最佳球員。
其實早於皇馬歐聯遭阿積士淘汰後已傳出拉莫斯與佩雷斯於更衣室互罵消息，是次則為皇馬首次官方承認拉莫斯尋求轉會。雖然佩雷斯否決拉莫斯免費離隊要求，但並不代表有球會出錢唔會放人，現時不得不承認於佩雷斯統領下嘅拉莫斯已非球會必要留住之人。
