早前基沙文宣佈離隊，唔少傳媒都指戴巴拿或將成接班人加盟祖記，而近日其經理人兼哥哥 Gustavo Dybala 亦終於開腔提及戴巴拿去向。
戴巴拿自2015年加盟祖雲達斯後至今效力四年，四屆都為球隊贏得意甲並三度入選意甲最佳陣容，今屆卻淪為後備。Gustavo Dybala早前受訪就直指「弟弟於祖雲達斯已經不如以往咁快樂，佢今季只有5個聯賽入球。我目前未能確認，但戴巴拿有好大可能將會於今夏離開都靈。以往佢於意大利感到輕鬆，但佢同好多祖記嘅球員一樣現時並不快樂。戴巴拿唔係唯一想離隊嘅祖雲達斯球員。」
上季為球隊金童嘅戴巴拿今季只獲28次聯賽上陣機會，當中有6次以後備登場，並只交出5入球4助攻，難怪球員有離開嘅意欲。
除馬體會外，曼聯亦盛傳有意羅致呢位阿根廷前鋒，最後結果還看戴巴拿意願。
