曼聯名宿艾夫拿早前受到外媒採訪，選出曾共同效力隊友中嘅最佳十一人陣容，阿根廷前鋒迪維斯成功入選，而朗尼則名落孫山。
艾夫拿嘅十一名單中，曼聯共佔去八個席位，當中有唔少都係紅魔盛世嘅成員，而其餘三個席位則為祖雲達斯球星。
守門員 – 雲達沙
於門將上艾夫拿嘅選擇並無特別驚喜，兩人曾經共事五個半球季，期間共奪得2屆歐聯及四個英超冠軍。
艾夫拿表示:「雲達沙係世上唯一作出撲救後不會對隊友咆哮嘅龍門。雲達沙係防線中嘅領袖，佢非常冷靜，而且經常與我們作出交流，亦永遠都會係合適嘅位置上出現。」
後衛 – 艾維斯、李奧費迪南、基亞連尼、艾夫拿
於後防四人選擇上，艾夫拿理所當然選擇自己為左閘，中堅二人亦非常合理，而右閘之爭則為最有爭議。
對於選擇艾維斯而非加利仔，艾夫拿就解釋:「我非常喜歡加利尼維尼，佢係一位穩定嘅右閘，但我認為艾維斯更有天賦。」
中場 – 朴智星、史高斯、派路、傑斯
艾夫拿嘅最佳中場隊友中，三位都係來自曼聯，只有派路來自祖雲達斯，而朴智星嘅選擇相信就最令人驚喜。
對於選擇該名南韓國腳，艾夫拿稱:「朴智星係一位士兵。於2008年四強對陣巴塞時，佢兩場都係最佳球員。雖然最後佢於決賽未能上陣，但佢絕對係我心中目嘅鬥士。」
「很多人問我，當我加盟曼聯時邊位球員令我最欣賞。佢地期望我嘅答案係朗尼或者C朗，但我會選擇史高斯及傑斯，兩人都非常出色，係我心中嘅規範對象。」對於史高斯、傑斯嘅選擇艾夫拿再作補充。
前鋒 – C朗拿度、迪維斯
當艾夫拿加盟曼聯之時，C朗已經於奧脫福渡過兩個半球季。C朗目前已經成為世上最佳球員之一，艾夫拿表示自己對此並不意外，相信大家都記得艾夫拿談及到C朗家食飯嘅趣事。
對於該名葡萄牙球星，艾夫拿表示:「佢係與我合作期間最專業嘅球員。所以當人們將佢與美斯作比較時，我永遠都會選擇C朗拿度。美斯係神嘅恩賜，上天會告訴佢如何踢球，但C朗真的非常勤力。」
整個十一人中，另一個前鋒選擇則最令人意外，艾夫拿嘅選擇為迪維斯而非朗尼，對此該名左閘有以下解釋：「呢個係一個極為困難嘅選擇，迪維斯還是朗尼。不過當問到我內心嘅時候，即使朗尼與我非常好朋友，我決定選擇迪維斯。我曾經與迪維斯於曼聯及祖記作隊友，佢係一位戰士，係一個神奇嘅球員。若對方後衛需要同時面對迪維斯及朗尼，我會深表同情。」
教練 – 費格遜
最佳陣容教練一席毫無懸念由費Sir擔任。艾夫拿指:「人們都非常尊重費格遜，我非常害怕令佢失望。我們有緊密嘅關係而我認為此非常重要。當我需作重大決定時，我100％會先咨詢費Sir。」
最難纏對手 － 占士米拿
除以上陣容外，艾夫拿亦特別選出生涯中遇過最難纏對手，結果令人驚喜地為占士米拿，而非美斯。
對於占士米拿嘅選擇，艾夫拿則笑稱:「佢令我非常困擾，因為我係一位攻擊型嘅後衛。當我們踢打呲戰嘅時候，我永遠都需要面對佢，佢非常麻煩。至於美斯？我可以應付。」
