眼見利物浦昨夜上演大逆轉進軍歐聯決賽，熱刺領隊普捷天奴於賽前受訪亦對今晚晉級非常有信心，更揚言贏得歐聯有機會離隊。
熱刺今晚將會作客阿積士，首回合主場落後一球嘅熱刺今晚將有孫興民復出戰力大增，一球之差並非處於十分劣勢。賽前記者就向普帥問到若熱刺今季最後贏得歐聯佢會有咩感受，普帥就直指:「完成於熱刺五年嘅章節，然後回家。」
呢個答案令在場記者都十分驚訝，普帥就再補充:「呢個唔係一個玩笑。於熱刺目前嘅情況下，係今季贏得歐聯絕對係極之夢幻。到時候或者我需要去考慮一下去做不同嘅野。因為要再複製呢個奇蹟，你知道…. 不過無論如何今夜我地將會盡力打入決賽，球員需要放鬆去踢。由賽季開始已經無人期望熱刺可以殺入歐聯決賽或者保到英超前四，球隊並無任何野可以輸。」
熱刺及阿積士四強次回合大戰將於今夜3:00再度上演，到底係黑馬阿積士再殺一隊勁旅，抑或熱刺可以逆轉成功？球迷記得較定鬧鍾起身睇波啦！
