英超焦點戰，曼聯對利物浦明晚就會正式上演。唔少媒體或球迷都預計今仗或會係紅魔主帥蘇斯克查嘅生死之戰，但蘇B似乎就對自己保留帥位信心十足。
曼聯今季表現未如理想，目前於英超八戰只得九分，排第十二位，與降班區域只差2分，今場失利隨時跌入降班區。
對住被指今場再輸會被曼聯辭退，蘇斯克查於早前接受 Sky Sports 專訪時就回應:「我已經與活華特(曼聯CEO)有深入嘅交流，結論係我與球會之間有一份長達三年嘅合約，我們對球會亦有長遠嘅計劃。我被任命為曼聯教頭，輸一、兩場比賽不是什麼大事，我唔需要去與任何人作出保證。球會與我之間有長遠嘅計劃，收購亦正在進行中。」
對於重用年青人嘅做法，蘇斯克查表示:「教練對球隊擁有最終嘅決定權，我非常肯定現時嘅球隊體系係正確。有時候曼聯嘅核心球員會缺陣，年青球員於呢種情況下出戰非常艱難，佢地亦表現出自己嘅能力，我對陣中嘅年輕球員感到滿意。」
曼聯現時有數位核心球員如迪基亞、普巴等都因傷未必可以趕及雙紅會上陣。雖然蘇斯克查表示信任陣中年輕球員，但面對強勢嘅利物浦隨時會係一場大屠殺，帥位能否保住似乎過得到活華特，都未必過得到球迷嘅一關。
