西班牙報章 Sport 透露，PSG巨星尼馬渴望回歸巴塞。
自2017年由巴塞轉投巴黎後，尼馬雖成為隊中大佬，但一直過得並不如意。當初尼馬離開巴塞這comfort zone，除咗希望可以脫離美斯陰影外，亦希望於另一聯賽闖一番事業。無容置疑呢位巴西球星轉投巴黎後令呢支富豪球隊於法國更加無敵，但球隊每每去到歐洲舞台都令人失望，近三屆十六強止步亦令銳意成為「世界最佳」嘅尼馬萌生去意。
此外，麥巴比呢位超新星於PSG變得更加重要，有唔少球迷更認為其重要性比尼馬更大，尼馬陣中大佬位置隨時不保。據 Sport 報導，尼馬現時對當初離開巴塞非常後悔，極為渴望今個夏天就重返西甲呢個更高影響力嘅舞台。
對巴塞而言，雖然當初尼馬離開有不快樂嘅事發生，但球隊為其尋找嘅替代品不論係古天奴或是丹比利都未能令人滿意。對於今夏力求補充鋒線嘅「地上最強」而言，重簽尼馬可能所費不菲，但可重新收購呢位世界級嘅球星或許亦值得投資，至少比再簽下第三位古天奴/丹比利之流更有保證。
報導亦指尼馬目前已嘗試說服PSG放人，不過由於兩隊之間嘅關係並不算良好，故有一定難度。而早前與尼馬屢傳新聞嘅皇家馬德里，Sport就指尼馬本人暫時未有興趣加盟。
