西班牙媒體大踢爆，今個夏季轉會窗熱門人物尼馬原來曾先後與四位皇馬球星聯絡，希望可加盟銀河艦隊。
尼馬嘅轉會新聞可算是除普巴外於夏季轉會窗最受注目嘅連續劇，由最初指皇馬已開出重金引入該名巴西球星，到最後只剩下巴塞各球星力爭尼馬回歸，但最後結局卻是與巴黎翻面後繼續留隊。
若大家只於轉會窗尾段追看消息，相信大家接收到嘅都係尼馬一心一意望重返巴塞與美斯、蘇亞雷斯重組 MSN 組合，但似乎真相又並非如此。
西班牙有媒體於昨日爆料，指尼馬原來一直最想轉投嘅係皇家馬德里，而非老東家巴塞。於八月嘅時候，尼馬曾經先後與四位皇馬球星進行交流，希望可以幫助到自己落戶馬德里。
報導指四位球員包括皇馬隊長拉莫斯、兩位同胞馬些路、卡斯米路及最後關頭聯絡嘅摩迪，並指尼馬於通話中要求對方說服球會簽入自己。雖然於轉會窗中皇馬與巴黎多次進行商討，但最後佩雷斯認為尼馬超過2億嘅轉會費及高薪都為球會帶來巨大影響，故於8月20日正式向PSG確認唔會於剛過去嘅轉會窗簽入尼馬，反而選擇留低巴爾、占士作今季衝冠陣容之用。
於轉會窗後期，尼馬與巴黎基本上已經破裂，所以便開始用盡方法希望可以回歸魯營。據報尼馬曾經與美斯作電話交流，希望美斯可以遊說球會將佢帶回巴塞，而美斯亦有表示非常擔心尼馬會轉投死敵皇馬。
故事嘅結局相信大家都清楚，皇馬、巴塞都沒成功簽入尼馬，尼馬留隊後於早前亦發表願為PSG付出生命之宣言，大家可以觀望一下該名巴西球星是否真正願意長留法甲。
