十大 U21 最高身價球星榜出爐

現今球壇通漲嚴重，唔少球員年紀輕輕身價就已經水漲船高，未夠21歲就已經達上億歐元。近日著名球員估價網站 transfermarkt 就公佈出現時十大 U21 最高身價球星榜，一齊睇下你心愛嘅球隊有無球員上榜啦！

1) 辛祖 Sancho 1.2億歐元

效力多蒙特嘅辛祖成為最高身價U21球員絕對唔會令人出奇。現時19歲嘅辛祖上季已經交出亮麗成績，整季上陣43場貢獻13入球19助攻，於去年夏天已惹來唔少豪門關注。

今季辛祖表現再上一層樓，單計德甲嘅22場比賽，呢位19歲新星已經交出14個入波、15個助攻，場均貢獻超過一球，加上其英人嘅身份，身價達天價亦絕不令人意外。

2）祖奧菲歷斯 Joao Felix 1億歐元

20歲嘅祖奧菲歷斯今年夏天以天價1.26億歐元由葡超轉戰馬體會。雖然於熱身賽有不俗發揮，不過呢位有「新C朗」之稱嘅葡萄牙新星於傷病影響下今季並未有為馬體會帶來太大幫助，整季上陣19場西甲賽事只有3個入球，1個助攻，與身價嚴重不符。

雖然身價有所下降，不過只有20歲嘅菲歷斯仍然具有一定嘅潛力，暫時仍以1億歐元身價穩佔U21身價榜第2位。

3) 夏維斯 Kai Havertz 9000萬歐元

德甲中場新星夏維斯目前亦位處榜中第三位，雖然未達億元，但九千萬對20歲嘅球員嚟講亦係一個非常誇張嘅身價。

夏維斯嘅高昂身價主要因為去季光芒四射嘅表演，全季為利華古遜攻入17球，去年轉會窗已經有傳利物浦、曼聯、巴塞等豪門都有興趣將佢收購旗下。今季夏維斯雖然表演有所回落，暫時於21場德甲中為球隊交出5入球，4助攻，但作為中場核心仍然對利華古遜極為重要，身價亦繼續高企不下。

4) 迪列治 De Ligt 7500萬歐元

於阿積士有亮眼表現下，祖雲達斯去年以8550萬歐元將呢位荷蘭後防新星帶到都靈。

雖然於季初有所不穩，令迪列治與菲歷斯一樣轉會後身價有所下降，不過呢位荷蘭後防目前已經站穩陣腳，成為班馬兵團中後防重要嘅一員。迪列治目前仍然未可以好像其國家隊大哥雲迪克般帶給人極為穩建嘅感覺，但目前嘅表現及潛力，現時仍然對得起7500萬歐元嘅身價。

5) 夏蘭特 Haaland 6000萬歐元

第五位終於數到夏蘭特。大家心中可能認為呢位超級射手身價會更高，不過其實於2個多月前多蒙特只係用2000萬歐元收呢位挪威射手簽入，短短二個月時間已經升值3倍。

夏蘭特狀態有多火熱相信不用再以數據去說明，由薩爾斯堡到多蒙特都仍然可以保持良好狀態，入球如麻下短短兩個月已成為該德甲豪門前場不可或缺嘅得分點。雖然目前夏蘭特只被估值6000萬歐元，但相信若該名挪威前鋒可以保持到狀態，要超越隊友辛祖嘅身價亦絕非不可能嘅事．

6) 根度斯 Guendouzi 5000萬歐元

7）洛迪高 Rodrygo 5000萬歐元

8) 辛尼奧路 Zaniolo 5000萬歐元

9) 雲尼斯奧斯 Vinicius Junior 5000萬歐元

10) 干拿迪 Konate 45000萬歐元