於剛過去嘅夏季轉會市場球壇產生巨變，唔少巨星都於夏天離隊他投，包括夏薩特、基沙文等巨星今季都為新東家披上新戰衣。於新季開鑼後，大家又是否知道到底各豪門陣容嘅總價值改變如何呢？
著名德國網站 transftermarkt 早前就為新一季各支歐洲豪門嘅陣容作出市場價格估計，並列出排行榜，結果曼城於「最貴陣容」榜上順利登頂，成當今球壇最貴嘅球隊。
根據 transftermarkt 所作嘅統計，曼城整隊嘅市場價值高達12.8億歐元，比起第二位嘅皇馬高出約1億歐身價。「藍月亮」陣中有四位球員都被評估為價值一億歐元以上，當中包括史達寧(1.4億)、迪布尼(1.3億)、辛尼(1億)、B施華(1億)，全部都為攻擊球員。此外，曼城全隊共有14名球員身價高達5000萬歐元以上，星光熠熠嘅陣容實在令唔少豪門非常妒忌。
雖然皇家馬德里上季表現失色令唔少球員嘅身價有所下調，但今夏大灑金錢重建嘅「銀河艦隊」仍然緊隨曼城成為當今球壇第二豪華陣容，市場價格為11.9億歐元。由車路士重金轉投嘅夏薩特成為「銀河艦隊」中嘅身價王，市價高達1.5億歐元。此外，皇馬陣中亦有多達13位球員身價被評定為5000萬歐元以上，不過當中8位今季身價已有所下調。若狀態再持續低迷，來年皇馬嘅陣容估值相信又要再依靠新援來保持。
至於第三位則由皇馬嘅死敵巴塞隆拿奪得，陣容估值為11.8億歐。基沙文今季雖然以高價由馬體會轉投，但其1.3億歐元身價仍然未能與32歲嘅球王美斯嘅1.5億媲美，只能屈居「地上最高」身價第二名。巴塞隆拿陣容中，有11位球員身價估值超過5000萬歐元。
除以上三支豪門外，利物浦、PSG、熱刺、祖記等亦成功打入前十，而紅魔鬼曼聯於榜中只能屈居第十一位，由陣容估值已可預見其與同市宿敵之間之差距。
