英超轉會窗雖然已經完結，曼聯於未能尋找到代替品下暫時仍然留得住普巴，但其未來動向仍然未明。
早前曼聯於今季英超首仗大發神威以4:0擊敗勁敵車路士，賽後普巴受訪時就曾明言自己未來仍然係一個好大嘅問號，令人難以捉摸其最新動向。
早於轉會窗開啟前，普巴及其經理人拉奧拿已明言今個轉會窗希望離隊尋求新挑戰。於賽前集訓開始前更有傳媒指出普巴希望可以缺席操練而迫使曼聯放人，但最後因皇馬不希望令事情變得太過複雜而依期歸隊。
雖然英超嘅轉會窗已經關閉，但意甲、西甲等聯賽於9月2日前仍然可以購入英超球員，故祖雲達斯、皇家馬德里兩隊有興趣嘅「普巴爭奪者」仍然有機會於今夏搶入呢位法國中場。
該曼聯球星嘅哥哥馬迪亞斯普巴早前嘅訪問就再為此事增添猜測，佢向 El Chiringuito 指出：「當然佩雷斯有能力可以購入普巴，世界上無野係無可能發生。我唔可以向你確保普巴會一直留於曼聯，大家都知道佢希望離隊，但佢現時唔會怪責任何人。普巴目前仍然在等待，佢一直在努力並期待住事情嘅發展。係足球世界你永遠唔知下一步係點，直至九月二日前任何事情都有機會發生。」
「我弟弟嘅夢想係贏得歐聯。」馬迪亞斯普巴補充，似乎亦有暗示紅魔未能挑戰歐聯之意。
除「銀河艦隊」外，意甲班霸祖雲達斯亦被指對普巴有意，但相信目前需要極有誠意嘅報價先有機會打動曼聯於未有替補下放走普巴。
