曼聯上周宣佈與老將馬達續約兩年，talksport 就透露原來馬達續約背後接受大幅減薪。
紅魔自山齊士來投後整隊嘅薪金水平大幅上昇，近年一直飽受續約問題困擾。普巴、迪基亞、拉舒福特等主將都曾被報導因山齊士人工過高而希望大幅加薪再考慮續約，而靴尼拉今季亦因未能就薪金與球會達成共識離隊。
不過世界上總有球員非單純為追求更高薪金而踢，馬達可能就係其中一位。talksport 指剛與曼聯續約嘅馬達嘅周薪將由18萬磅下調至13.5萬磅，大約減幅為25％。雖然馬達已經31歲，但於人人追求更高周薪嘅紅魔願意接受減人工安排亦屬難得。
馬達自2014年起已經開始為曼聯效力，雖然並非一直長任正選，但其謙厚性格加上場上拚命都贏盡球迷歡心。呢位西班牙球員今次被披露降薪續約或令佢於球迷心目中地位更高，有指曼聯已準備於馬達退役後於管理層為佢留一席位。
