據 La Gazzetta dello Sport 報導，現時無業嘅艾歷尼願意入主拯救水深火熱嘅曼聯，但條件為球會必須立即解雇蘇斯克查。
曼聯今季成績再創新低，於八場英超過後只得9分排12位，當中只有兩場勝仗，與降班區只相差2分。早前有外國媒體進行統計，蘇斯克查為費格遜後四位領隊中平均為球隊取得分數最低嘅教練，平均只得1.7分，更諷刺嘅係上任被辭退嘅摩佬為四位中最高，有1.97分，只比費Sir嘅2.06分略低。
雖然蘇斯克查獲得不少舊隊友名宿公開支持，但其糟糕戰績加上雜亂無章嘅進攻近期已屢屢受到球迷柴台，奧脫福已出現一片「Solskjaer OUT」嘅呼聲。
據報曼聯已私下與今夏離開祖雲達斯嘅艾歷尼聯絡，而該52歲嘅教頭亦對執教曼聯非常有感覺。不過艾歷尼就為曼聯開出一個條件，就是紅魔必須立即解雇蘇斯克查讓自己上任執教，令自己有足夠時間去為曼聯脫離困境。報導同時亦指出若曼聯管理層仍然就換帥一事猶豫不決，當拖到12月份時艾歷尼就再不會接受紅魔之邀請。
曼聯於國際賽期後就會回到英超面對利物浦嘅挑戰，該場賽果或會影響活華特對蘇斯克查嘅去向決定。
