曼聯球迷再次失望！昨夜紅魔於聯賽盃主場迎戰羅奇代爾，雖然最後12碼以5-3取勝，但與英甲球隊只能打1:1令唔少魔迷感到恥辱。
雖然今場只係聯賽盃賽事，但今場曼聯為重拾士氣派出強陣出戰，普巴、馬達、雲比沙卡等主力都悉數上陣，照實力計理應遠超對方。
「紅魔鬼」今場數據上狂攻對手，整場共泡製出31個射門，但面對英甲防線亦只能憑小將格連活特於68分鍾攻入主隊唯一入球，更被羅奇代爾於76分鍾就憑只有16歲嘅 Matheson 追平，雙方需進入12碼分出勝負。
羅奇代爾目前於英甲排行17位，於9輪比賽只獲得10分，為下遊球隊。該英甲球隊全隊嘅總身價只價值248萬歐元，比起曼聯任何一位球員都低，單計普巴更為羅奇代爾整隊嘅40倍身價。
於76分鍾 Matheson 入球時，全場奧脫福球迷都報以噓聲，對球隊表現極度不滿，認為於主場被英甲下遊球隊迫和絕對是一種恥辱。當中不少球迷更大喊「蘇斯克查下台」，似乎無法再忍受如今嘅曼聯。
曼聯昨夜排出的陣容，球迷原本期望一場大勝以一掃頹勢，最後結果卻再一次令球迷失望，甚至感恥辱。紅魔現時於過去七場比賽只能獲得兩場勝仗，蘇斯克查教練之路還能走到多遠呢？
