據 Skysports 透露，曼城已鎖定葡超嘅般奴費南迪斯同祖奧菲歷斯，希望可於今夏將呢兩大新星帶回伊蒂哈德球場。
24歲嘅般奴費南迪斯為一名土生土長嘅葡萄牙人，現時為士砵亭隊長。般奴費南迪斯自上季起已經引來唔少豪門關注，呢位葡萄牙中場今季表演更加神勇，於31場葡超中共交出19入球13助攻，連同其他比賽更於50場比賽狂轟31球，十分驚人。除咗曼城外，同市宿敵曼聯亦曾被指有意於今夏收購呢位中場猛將。不過近日外媒就透露曼城目前已經接近以£50m至£60m左右簽入呢位中場，好大機會成為藍月亮今夏第一簽。
此外，另一位葡超新星祖奧菲歷斯亦被指為曼城另一主要目標。年僅19歲嘅佢係一位著名嘅FM妖人，目前效力於葡超賓菲加。今季為球隊上陣37場共交出17球8助攻嘅亮眼成績，有「新C朗」之稱嘅菲歷斯被譽為現今球壇其中一位最注目嘅新星之一。報導指出曼城將於確認奴費南迪斯轉會後正式向賓菲加求購祖奧菲歷斯，為明年約滿嘅大衛施華接班。
