據 Sky Sports News 報導，曼聯已停止向熱刺求購球星艾歷臣既工作。
英超轉會窗於當地時間8月8日下午5時就會正式關閉，而今日就陸續有更多極具爆炸性嘅新聞傳出，例如曼聯以5000萬報價艾歷臣，阿仙奴、熱刺、曼聯欲租借古天奴等等。
就熱刺而言，目前球隊正盡力簽入戴巴拿及向巴塞租借古天奴以加強實力。由於艾歷臣早前曾明言希望尋求新挑戰，而其合約亦於明年到期，積極年輕化嘅熱刺就被指希望降價至5000萬鎊左右放售該丹麥國腳而避免人財兩失。
雖然艾歷臣技術出眾，亦為熱刺球隊核心，但其實市面上有意嘅球隊並不算多。當中被認為最有可能購入該熱刺中場嘅「銀河艦隊」目前仍然努力收購普巴當中，而今日唯一傳出有意以5000萬鎊作收購嘅只有曼聯。
不過 Sky Sports News 就指曼聯已對此宗交易正式放棄，因為紅魔鬼認為27歲艾歷臣本身只係一心希望轉會到皇馬，而非同聯賽嘅曼聯。
若曼聯未能收購艾歷臣，球會將會不惜一切力留普巴，令皇馬亦未能順利簽入，而熱刺最後仍可能因未有足夠資金未能簽入戴巴拿。
曼聯、熱刺、皇馬、祖記四隊之間嘅一場鬧劇，到最後可能會正式壽終正寢。
