曼聯上仗英超以兩球不敵韋斯咸，目前開季六場只得8分，更被英國媒體踢爆更衣室氣氛相當差極。
英國報章報導，蘇斯克查於曼聯對陣韋斯咸半場時於更衣室直接指出球隊嘅表現十分沉悶，希望球隊可以於下半場踢出水準反勝對方。
不過結果大家相信都知道，作客嘅紅魔以2球落敗。蘇斯克查更於賽後回到更衣室暴怒，怒指球員嘅表現「令自己非常尷尬」，非常不滿一眾曼聯球員嘅表現。
蘇斯克查自去年回歸後，雖然曾經有一段時間一爆發，但目前為止正式領軍嘅17場比賽中只勝出5場，曼聯球迷定必不會就此收貨。
屋漏偏逢連夜雨。除戰績不佳外，曼聯現時亦面對鋒線缺人問題。於剛過去嘅轉會窗曼聯大力補強後防，簽入哈利麥佳亞、雲比沙卡等球星，但同時亦放走山齊士、盧卡古等等進攻主力。現時曼聯陣中三位可踢中鋒嘅球員，包括馬斯亞、拉舒福特及小將格連活特都面對傷病問題，今晚聯賽盃對羅奇代爾分分鍾要靠久未入波嘅連加特攻堅。
本周曾有外媒指出蘇B已獲董事會批準，一月份將會大開水喉作陣容收購之用，相信是次重心會為攻擊球員。不過曼聯近期六場比賽只獲兩勝，以目前走勢嚟睇蘇斯克查能否捱到一月仍然係未知數。
延伸閱讀: 沙利已決定冬季放走戴巴拿
