眼看巴塞早早完成收購迪莊，死敵皇馬今夏轉會窗睇嚟暫時都過得唔太如意。夏薩特加盟一事遲遲未有定案，早前被指已接近完成收購嘅盧卡祖域昨日又發表言論疑似請銀河艦隊「食檸檬」。
上星期有唔少媒體都指皇馬接近以6000萬歐元身價收購呢位當紅嘅鋒霸，但由於法蘭克福不停索要更高轉會費故遲遲未有落實。而近日盧卡祖域早前受訪時大談對自己前路睇法，說法卻與皇馬所希望聽到嘅背道而馳。
除德甲賽事外，盧卡祖域今季於歐霸盃亦大放異彩，短短上陣14場就攻入10個入球，效率驚人。呢位塞爾維亞射手就指「對住我個人於歐霸盃嘅經驗，我認為某些歐洲聯賽非常適合我及我嘅風格。德甲係一個體能要求相當高嘅聯賽，但經歷對陣車路士及國際米蘭後，我認為自己可以於意甲或英超球隊表演得更好，兩個聯賽嘅足球風格非常適合我。」佢又補充「非常期待自己有朝一日可以成為世上最佳球員。有一樣野係無容置疑－我希望於職業生涯取得成功。」
皇馬對盧卡祖域有興趣已經係公開嘅秘密，未知呢番話會否令收購呢位塞爾維亞射手難度再增呢？
