法卡奧早前轉投加拉塔沙雷雖然未受到太大注目，但其加盟令當地球迷瘋狂，「老虎」於當地嘅亮相儀式更吸引超過4萬名球迷到場支持。近日 Bleacher Report Football 就特別為各球員亮相儀式嘅支持球迷數目作出統計，C朗拿度再次於此排行榜中稱霸。
2009年7月6日，C朗拿度當時以破世界記錄嘅8000萬鎊由曼聯轉投皇家馬德里後首次於班拿貝亮相。根據統計當時C朗嘅亮相儀式獲得超過75000名球迷入場支持，為歷史上最多球迷出席嘅亮相儀式，力壓第二位「球王」馬勒當拿當年加盟拿玻里時嘅65000名球迷出席。
至於排行榜中嘅三、四位球星亮相儀式記錄都為加盟巴塞隆拿時產生，當中包括伊巴嘅60000名及尼馬嘅57000名球迷出席亮相儀式，兩宗都係當年引起熱話嘅轉會。
值得一提嘅係，是次排行榜中皇馬佔去四席(包括C朗、卡卡、夏薩特及占士)，巴塞佔兩席，馬體會憑托里斯佔去一席，頭十名盛大嘅亮相儀式中西甲就獨佔7席可見西班牙豪門嘅球迷都對巨星非常瘋狂。
