據可靠媒體 Sky in Italy 透露，意甲班霸祖雲達斯今夏有興趣向曼聯回購普巴。
報導指呢支意甲八連霸球隊目前已經與普巴經理人拉奧拿開始商討轉會事宜，而曼聯亦已獲祖雲達斯通知其有意購買普巴嘅興趣。
回顧2012年，當時普巴於費Sir執掌下喺奧脫福過得極不如意下免費轉投祖雲達斯。於12-16年效力班馬兵團期間，普巴成長為一位極具潛力嘅世界級中場。除助球隊連奪四屆意甲冠軍外，亦帶領祖記於14/15球季殺入歐聯決賽，可惜最後落敗予當年如日方中嘅巴塞屈居亞軍。由於普巴於意甲成長為一位身體質素好，又極具創造力及入球能力嘅中場，曼聯於2016年以破當時記錄嘅一億歐元回購普巴。
自普巴回歸紅魔後，該名法國中場於135場比賽中射入31個入球。雖然普巴於回歸後偶然都有不少神來之筆，但控球太久、態度懶散等問題都令球迷感到不滿。普巴於場上表現一般之餘，場外亦經常成為焦點，多變髮型、迫走摩佬等都成為傳媒大肆報導嘅對象，又經常有行為令球迷認定普巴為「扮大佬」、「無心踢」等等，種種因素加起來令唔少曼聯球迷甚至名宿目前已經認為呢位應屆世界盃冠軍成員係「可走可不走」嘅成員。
普巴現時與曼聯尚有2年合約在身，而球隊更有選擇強行續約1年嘅權利。除祖雲達斯外，早前西甲皇馬亦被指有意收購普巴，而普巴當時亦以「效力皇馬為所有球員夢想」作出回應。
祖雲達斯今季繼續稱霸意甲，但於球會最想得到嘅歐聯上就被阿積士淘汰出局，領隊艾歷尼於季尾亦正式離隊，目前為無帥狀態。Sky in Italy 同時指出剛帶領車路士奪歐霸嘅教頭沙利將成「班馬兵團」新主帥，或會於短期內正式確認宣佈。
