據 La Gazzetta dello Sport、Marca 等多間外媒報導，於拜仁完成租借嘅皇馬球星占士洛迪古斯將於短期內正式加盟拿玻里。
報導指拿玻里會以分期形式買斷占士，費用為5000萬歐元，總數比起拜仁嘅強行買斷價4200萬歐元高。當中拿玻里今夏會支付1000萬，而餘下4000萬將於下年六月全數支付。
隨住洛迪高、盧卡祖域、夏薩特等進攻球員加盟，當初因不受施丹重用而被租借至拜仁嘅占士洛迪古斯於球隊只會更加不重要，離隊對皇馬及占士本人嚟講都係最好選擇，故是次拿玻里嘅分期付款方式仍獲皇馬接受。
雖然皇馬並不願意重用占士，而拜仁亦未有買斷呢位於世界盃一嗚驚人嘅球星，但占士過去兩季於德甲表現其實相當不錯。占士於17/18及18/19兩個球季共為拜仁於德甲上陣43場，交出14入球、15助攻，於前場起到相當重要嘅作用，若非與球隊教練有問題嘅話拜仁以4200萬磅可以簽入占士於現今球壇絕對為超值嘅交易。
除拿玻里外，早前有指另一支意甲球隊祖雲達斯亦對占士有興趣，而曾於占士合作嘅陣中主力球星C朗拿度亦力勸佢加盟。不過按照目前情況嚟睇，占士似乎更想與安察洛堤再次合作。
