國際米蘭與曼聯前鋒盧卡古嘅傳聞已經炒作數周，而近日國米終於正式就此交易作官方回應。
國米行政總裁 Giuseppe Marotta 早前受傳媒訪問，大談於邀請新領隊干地後球隊嘅轉會政策。Giuseppe Marotta 指:「目前我地正於轉會市場努力中，希望可以為球隊來季帶來最好嘅陣容。國際米蘭對未來極具抱負，但亦會同時尊重一系列嘅財政限制。我地於轉會窗上唔會太過急進，因為急進會令我地犯錯。國米好清晰知道需要有耐性，目前已經有重要嘅轉會目標。」
另外 Giuseppe Marotta 亦大談對盧卡古及迪斯高嘅收購，佢就補充:「就如下一盤棋一樣，我地需要耐性。兩位都係我地嘅目標，但需要尋求一個合適嘅交易。儘管球員對國米有濃厚興趣，但這並不表示什麼，球會仍然需要就財政方面作出考慮。」
至於早前有外媒盛指尼因高蘭及伊卡迪即將離隊，呢位 CEO 亦對此表示睇法:「尼因高蘭和伊卡迪?我地需要就此清晰及透明地表示，兩位都係非常好嘅球員及有極高天賦，但呢樣並不足夠，兩位並非於我們來季計劃之中。目前伊卡迪已經於市場當中，但我們仍然會尊重彼此之間嘅合約。」
自正式邀來前車路士教頭干地執教以來，國米與盧卡古嘅傳聞就從未休止。大家都知道干地一直都對盧卡古非常欣賞，2017年時干地就因為球隊未能簽入「新魔獸」而改簽莫拉達，最後盧卡古為紅魔上陣96場攻入42球。
Giuseppe Marotta 嘅訪問亦將一直嘅傳聞正式化作正式嘅球會交易協商，加上盧卡古亦已表明有意轉到意甲為干地效力，為討好干地歡心相信國米定必會盡力達成交易，但球隊目前財力或成最終能否完成收購嘅關鍵。
