歐霸盃決賽明晚正式上演，早前表明已決定未來去向嘅夏薩特一番話令大家幾乎可以肯定佢將會離隊。
作為車路士絕對主力，夏世三早已說明於歐霸盃後去向將會正式明朗。於早前受訪佢就指「歐霸盃決賽，對我、球會、沙利以至球迷都係非常重要。當您有機會殺入決賽，無論係歐霸盃、歐冠、抑或聯賽盃，你都只會想贏，想將獎盃捧走慶祝。我地於聯賽盃未能捧盃，目前歐霸盃將成我們唯一目標。」
「我只想贏波而回，無論我有入球與否。如果呢場係我最後一場比賽，我希望可以捧走歐霸獎盃。呢個會否係一個完美道別？是的。」夏薩特補充。
夏薩特與皇馬嘅傳聞已持續多時，今個轉會窗前就看似有突破，球員本身亦不停放風表示想加盟皇馬。有指車路士與皇馬兩隊基本上已經同意交易，現時問題只存在於價格上面。車路士希望可從夏神身上獲得1億3000萬磅，而銀河艦隊則認為下年滿約嘅夏世三只值8800萬磅轉會費。
