基沙文或成尼馬加盟銀河艦隊關鍵？

據AS(阿斯報)報導，基沙文會否加盟巴黎聖日耳門將成佩雷斯可否收購尼馬關鍵。

基沙文早前宣佈離隊，大家都猜測佢將會加盟同聯賽嘅巴塞。不過昨夜有報導指基沙文與巴塞仍未就薪金達成共識，而PSG就有意於呢個時候搶人。據悉 PSG 嘅體育總監 Antero Henrique 目前正與基沙文嘅家人商討薪金，並保證會比巴塞目前所提出嘅 1700萬歐元年薪為高，或令基沙文對下一站有多一個選擇。

與此同時，早前於法國球壇有良好網絡嘅 Le Parisien 曾報導巴黎準備以2.1億歐元向皇馬同時收購巴爾、伊斯高及卻奧斯三位大將，加上基沙文嘅1.2億買斷費用，巴黎若全部成功嘅話轉會支出會近3.3億歐元。碰巧呢個價錢亦係巴黎方面願意出售尼馬嘅售價，以四換一亦能保證球隊唔會受到歐洲足協嘅財政政策所影響。

皇馬方面目前簽入夏薩特、盧卡祖域看似已十拿九穩，官宣只係要等車路士及法蘭克福都完成今季目標。儘管已經簽入兩位巨星，AS仍指內佩雷斯仍然對尼馬有非常濃厚嘅興趣 – 即使不惜花費鉅款，除咗因為增強球隊實力外，27歲嘅尼馬於巴西嘅市場影響力巨大亦係佩雷斯嘅真正目的。

以3.3億歐元收購尼馬是否值得？相信大家都會有所保留。