近期皇馬收購步伐明顯加快，繼宣佈簽入德甲射手盧卡祖域後，世界級球星夏薩特亦隨即宣佈加盟，而里昂左閘費蘭特文迪睇嚟短期內就會成為銀河艦隊今夏第五簽。
費蘭特文迪目前正隨法國隊備戰今夜歐洲國家盃外圍賽作客安道爾嘅賽事，主帥迪甘斯於賽前記者會大爆呢位24歲左閘嘅去向:「費蘭特文迪兩年前仍在法乙征戰，佢進步奇快，有踢左右邊嘅能力，未來將為皇馬上陣。」
由與球員有緊密關係嘅迪甘斯口中說出相信比唔少外媒更有公信力，據悉費蘭特文迪即將接受皇家馬德里嘅體檢，轉會費約為5500萬歐元，將繼早年5750萬歐元轉投曼城嘅另一位文迪成最貴左閘第二位。
費蘭特文迪為一位左閘球員，現年24歲。由於佢速度極快，於球壇有「左閘麥巴比」之稱，若加盟皇馬將與馬些路競爭正選席位(盛傳施丹並不睇好Reguilon，將被外借)。費蘭特文迪於2年前被里昂以500萬歐元從法乙勒哈弗爾購入，今季於法乙為里昂上陣30場(共2529分鍾)，期間交出2入球1助攻，為里昂常規左閘。
即使簽入費蘭特文迪，銀河艦隊嘅重建工程並未完成。皇馬下一個目標將為中場中位置，暫時大熱人選為普巴及艾歷臣，今夏轉會支出隨時係天文數字。
延伸閱讀: 施丹欲簽普巴 皇馬高層心儀艾歷臣
