阿仙奴想清走奧斯爾已經並非秘密，但一直苦無人接手，不過目前睇嚟終於有突破。
土耳其媒體透露，土超費倫巴治目前已經向阿仙奴報價，希望可以租借奧斯爾，令兵工廠可以節省一部分薪金支出。目前奧斯爾於阿仙奴年薪屬高薪一族(約為1350萬英鎊)，而費倫巴治則願意承擔一半以上，願為奧斯爾支付800萬磅年薪。
現時唔少費倫巴治球迷已經於網上發起聯署，以#FenerSeniBekliyorMesut#(奧斯爾，費倫巴治在等)為題於社交媒體表達意願，並登上當地報搜排行榜第一。
奧斯爾近季屢受兵工廠球迷批評，甚至唔少名宿都表態指奧斯爾無資格踢阿仙奴。自與德國足總不和事件後，「大眼仔」上季於英超只上陣24場，交出5入球、2助攻，與以往助攻王嘅高效表演落差極大。
不過對阿仙奴而言，目前最理想為賣走奧斯爾以籌集資金購入沙夏。於奧斯爾無人問津下，到底兵工廠會否選擇蝕本借出大眼仔至唯一有意球會以節省薪金支出呢？
