歐霸決賽明晚就會正式上映，焦點除咗阿仙奴車路士兩支英超勁旅內訌外，日前公佈嘅講波陣容似乎更有睇頭。
雲加及摩連奴自分別離開阿仙奴及曼聯後，都分別於 beIN Sports 兼任足球評述，唯一直都於不同場次「講波」，未曾有合作機會。難得今次兩隊英超球隊於歐洲賽決賽碰頭，beIN Sports 就成功邀得兩位前教頭為呢場盛事增添亮點。
據悉摩佬及雲格將於決賽當日現身萬達大都會球場直播室內，就兵工廠及車仔嘅歐霸決賽進行評述工作。阿仙奴可算係雲格嘅第二個家，而摩佬亦為車路士捧走唔少大賽獎盃，今次兩大前教頭碰頭定必有火花擦出。
其實過往摩佬於英超執教曼聯及車路士期間都曾經與雲格擦出唔少火花，除著名嘅「雲格係失敗專家」論外，兩人更曾經於球場上有肢體衡突，可算係近季英超經典場面之一。是次「摩雲」一齊出任決賽評述，場下嘅唇槍舌劍或許會比台上嘅對碰更值得令人期待。
