歐霸盃決賽本月30日就會正式舉行。不過由於比賽地點遠在阿塞拜疆首都巴庫，雙方球迷都唔願意長途跋涉到場觀賽，屆時隨時出現空位。
是次比賽於可容納70000人嘅巴庫奧林匹克球場舉行。阿仙奴及車路士兩支參賽隊雖然只各獲派6000張門票，但目前分別只售出3500及2000張，尚有一星期嘅比賽只售出一半不到。
阿仙奴早前就曾經公開對決賽地點表示不滿，兵工廠指決賽地點交通條件非常有限，唔少球迷都未能親身到場支持愛隊，更指即使邊兩支球隊殺入決賽，於巴庫舉行都定必無法滿足球迷。
由於由英國到阿塞拜疆路途遙遠，唔少球迷都因為飛行時間及機票太貴而唔選擇到場參與呢場盛事。除阿仙奴及車路士外，歐洲足協嘅贊助商亦未能派出所有獲分派門票，早前已經退回巴庫當地售賣，睇嚟今次歐霸決賽現場將會相當冷清。
