據 Telegraph 報導，熱刺基本上已接受艾歷臣離開，但對英超及其他聯賽就標上不同價格。
報導指熱刺主席 Daniel Levy 已向有興趣簽入艾歷臣嘅同聯賽球隊(主要為曼聯)標價1億3000萬英磅，但對皇馬、祖記等海外球會則只標價8000萬磅。
對皇家馬德里而言，目前球會中場收購主要目標仍然為普巴。施丹重新上任後，於轉會市場上已比以往有更多話語權，而中場方面同胞普巴仍然為施丹首選。與此同時，由於今夏重建嘅皇馬轉會花費已達數億，主席佩雷斯則希望簽入價錢較低嘅艾歷臣，並希望以不多於7000萬磅簽入只剩一年合約嘅艾歷臣。最後事態如何或需等普巴一事有定局先可以決定。
此外，祖雲達斯亦被指對該丹麥國腳極有興趣。剛剛上任嘅沙利剛由英超離開，有指煙Sir一直對艾歷臣非常欣賞，於車路士時就曾直指其為熱刺隊內最欣賞之球員。不過與皇馬一樣，普巴亦為班馬兵團首要目標，艾歷臣亦只係未能簽入普巴之備選。
根據目前消息，普巴與艾歷臣都極有可能加盟皇馬或祖記，二人都曾公開表示現時為尋求「新挑戰」之時間。曼聯方面現時消息為極力希望留住普巴，而熱刺其實已開始著手處理艾歷臣離隊後之中場問題。
據外媒報導，普捷天奴目前已有一份頂替艾歷臣位置嘅清單，當中包括里昂嘅尼當比利、羅馬嘅贊尼奧洛、阿積士嘅雲迪比克、富咸嘅賴恩施斯隆都被視為潛在之頂替者。
