曼聯今季表現繼續低迷，魔迷間近期已不停出現蘇斯克查下台嘅呼聲，球隊活華特CEO日前就公開表明會支持蘇B繼續執教。
「紅魔鬼」於八輪英超比賽後只得九分，當中只曾勝出兩場，為球隊三十年以來最差嘅英超開局。自九月中歐霸取得勝仗後，曼聯已連續五場不勝，更先後於英超被韋斯咸及紐卡素擊敗，五場比賽中只攻入三球。
曼聯今季同時放走山齊士、盧卡古，不少魔迷都認為係不智之舉。球隊目前攻力疲弱，今季正式賽事進行11場只攻入11球，但當中有4球都為對陣車路士時攻入，不少賽事都未有入球，甚至未有中龍埋門。除咗進攻線上並無太多選擇外，唔少魔迷都質疑蘇帥領軍下嘅曼聯全無進攻套路，甚至比起英冠更差。
雖然近期開始不停出現換師嘅呼聲，但曼聯 CEO 活華特於早前受訪時就公開表明會支持蘇斯克查:「蘇斯克查及其團隊一直為曼聯嘅未來進行投資及建計，球會必須對他們有耐性。我們會專注於球會長期嘅發展及策略，短期內嘅挫折不會影響到蘇斯克查。」
曼聯於國際賽後將會回歸英超上演「雙紅會」，若再遭遇一場大敗嘅話，唔知活華特所講嘅「短期挫折」紅魔迷又是否可以承受得到呢？
