下周末最後一戰 二王子終離開羅馬

羅馬官方正式宣佈，二王子迪羅斯將於下周末主場對陣帕爾馬一戰後正式離隊，結束18年羅馬球員生涯。

迪羅斯為現今球壇少數嘅絕頂忠臣。二王子爸爸本身亦為羅馬球員，於羅馬出生嘅佢自小就跟球隊操練。於羅馬青訓系統訓練下於2002年最終成功升上一隊，與羅馬Icon托迪並肩作戰多年，直至好友退休後仍竭盡所能為呢支首都球隊付出。

迪羅斯於球場上主要出任防中，但佢技術全面，同時亦有極高嘅後上能力及傳送力，故於羅馬以至意大利國家隊都一陣坐穩正選之位。作為2006年世界盃冠軍功臣及2009年意大利足球先生，迪羅斯於職業生涯其實都曾獲其他豪門青睞，但呢位中場硬漢都一直不為所動，與羅馬共患難至今。

除咗球技、忠誠、拚勁令人難忘外，迪羅斯嘅火爆性格亦為人津津樂道。例如去屆世界盃外圍賽意大利最後一場賽事，當時需要贏波先有一絲生機嘅意大利與瑞典踢成0:0之際，教練要求迪羅斯出場上陣。但呢位火爆漢子即場就拒絕，並向助教指住恩斯治尼，表示:「我地需要贏波，你應該換一個進攻球員上陣。」並被記者全程拍攝到。該仗意大利未能擊敗對手無緣世盃決賽周，迪羅斯等老將亦於賽後隨即宣佈退出國家隊。

現今球壇金錢掛帥，曼城、巴黎甚至中超等球隊財力雄厚，唔少球員已經再缺乏以往對球隊嘅忠誠。另一方面，球會亦愈嚟愈重視功利，年邁嘅球員往往於生涯尾段就會被清走以騰出空間迎接新血。近年來於一個球會效力十年以上嘅球員已經買少見少，雖然迪羅斯並未宣佈正式退役，或會轉戰其他聯賽發展，但一位有實力球員於生涯最高峰都於同一球隊度過呢種忠誠都絕對值得大家尊重。