馬卡報報導，迪列治轉會巴塞隆拿一事因經理人不滿佣金受阻。
據報導披露，其實巴塞與阿積士已經就7000萬歐元嘅轉會費達成共識，而迪列治本人亦想跟隨迪莊一齊於下季轉會到巴塞踢波。不過現時問題卻出於迪列治嘅經理人拉奧拿身上。
拉奧拿於該位阿積士中堅轉會一事上，希望可以索取高達20％嘅佣金(1400萬歐元)，遠遠高於一般經理人於轉會所收取嘅5-10%，令阿積士非常不滿。雖然阿積士方面希望可以盡早完成交易，以用迪列治嘅資金提早為下季做好準備，但球會仍然堅拒拉奧拿嘅高昂佣金。據悉拉奧拿目前正將交易叫停，希望可以等待其他球會開出更高價錢，令自己可以收取想理想嘅佣金金額。
拉奧拿為球壇目前著名嘅吸血經理人，旗下有普巴、華拉提、伊巴等等巨星。早前哥帥就曾經指出普巴效力曼聯時，拉奧拿曾向佢兜售該法國球星，以求賺取巨額佣金。
