昨夜歐洲國家盃外圍賽，葡萄牙作客烏克蘭終於B組嘗到首敗，不過射手C朗於此役中又刷新驚人記錄。
比賽進行到72分鍾，葡萄牙獲得一個十二碼機會，結果C朗成功破網，完成職業生涯中第700個入球。
於今場比賽過後，C朗拿度成為現役中唯一攻入700球嘅球員，並於短短嘅974場比賽中完成，平均每場貢獻0.72球，長期高效確為相當恐怖。
於C朗攻入嘅入球當中，球會賽事共佔當中605球，賽事數目為811場。該葡萄牙球星於出道嘅士砵亭攻入5球、曼聯118球、皇馬時期為最多，共有450個入球，而C朗為目前效力嘅祖雲達斯則貢獻32個入球；而另外95個入球則為於葡萄牙國家隊上陣時攻入。
除以上數據外，C朗於職業生涯曾面對153個不同嘅對手都有破門，而700球中共完成54次帽子戲法。至於C朗最喜歡嘅對手相信係西維爾，呢支西甲勁旅曾經被C朗射破27次大門，為目前最多嘅球隊。
於歷史記錄上，C朗目前於射手榜中排行第六，當中普斯卡斯嘅746球及梅拿嘅735球都為預期可被打破嘅記錄，至於能否打破捷克/奧地利著名射手比簡805球嘅記錄，似乎就要睇下C朗呢種高效嘅水準仍然可以維持幾耐。
