車路士早前成功打入英超前四，鎖定下年歐聯資格。唔少報導都指主將夏薩特今夏將會攻成身退，並轉會皇馬，但日前車路士官網一則更新卻似另有啟示？
唔少傳媒都於早前表示皇馬與車路士已經達成協議，夏神轉會一事只待車仔於歐霸捧盃或是出局，完成所有重要賽事就會正式公佈。不過車路士目前深受轉會禁令影響，昨日更遭 FIFA 判定上訢失敗，需要再等待國際體育法庭判決，分分鍾會被禁兩個轉會窗收購，或有礙車神轉會一事。
車路士近日更於官網分享球隊與體香劑品牌 Rexona 嘅合作廣告《Movement is Everything》，當中除咗盛傳再被巴塞報價嘅韋利安登場外，被指即將轉會皇馬嘅夏薩特亦於廣告中擔正，並於片中大騷球技。呢個敏感時間車路士官網分享呢個廣告，到底係夏神告別之作，抑或向外界宣告夏薩特留隊呢？確實耐人尋味。
《Movement is Everything》廣告
