一直追求歐聯夢嘅41歲老將保方有最新動向，Sky in Italy 透露呢位意大利門神即將於今個轉會窗回歸祖雲達斯成副選門將。
一代傳奇保方生涯獲獎無數，除多屆意甲外，世界盃及多屆最佳陣容、最佳龍門都於其獎盃架上，唯獨效力意甲班霸祖雲達斯十七年都未能奪得歐聯，14/15及16/17球季兩度殺入決賽都不敵兩支西甲巨人巴塞及皇馬只能得亞，去年就決定離開老家轉投法甲勁旅巴黎聖日耳門希望衝擊首個歐聯獎座。
不過保方轉投巴黎似乎並非一個理想選擇。呢位一代門神加盟PSG後只能長居後備，而PSG更於歐聯十六強遭曼聯戲劇性反勝出局，距首次歐聯極遙遠就提早完季。賽季過後保方就正式宣佈會離開效力一年嘅巴黎，早前有指保方將會休息一年，亦有報導指列斯聯、波圖等都曾向其招手。
而今日意大利著名足球記者 Gianluca Di Marzio 就爆料，指保方目前正與祖雲達斯商討「愛回家」事宜，或將於今個轉會窗就重返老家，並願意擔任施捷斯尼嘅後備，希望可最後一次衝擊夢寐以求嘅歐聯夢想。
據悉祖雲達斯亦對保方回歸非常歡迎，只要成功賣走佩連到羅馬或西維爾就會再度簽入保方，並提供一年合約。如無意外保方今季後就會正式退役，祖記官方亦已為呢位門神預留一個管理層位置。
C朗、保方兩位一代傳奇都以帶領祖雲達斯奪歐聯為最終目標，若來季兩位最強「矛」與「盾」真正帶領班馬兵團捧走呢個歐洲最高殊榮，確實為一個夢幻嘅結局。
