即使早幾年西甲盛世壟斷歐聯，但英超一向為最受歡迎嘅聯賽。隨住列強堀起，英超已經由以往「BIG4」年代變成現今「BIG6」時代，每年六支強隊都為聯賽冠軍、前四歐聯席位鬥個你死我活，大家又是否知道每隊歷來最佳射手係邊個呢？
曼聯 – 朗尼(183球)
朗尼於2004年由愛華頓轉投曼聯，於奧脫福開展其神奇旅程。朗尼由加盟紅魔至2017年重返愛華頓期間，一共為曼聯貢獻183個入球，並為球隊帶來5個英超冠軍、1次歐聯、4個聯賽盃冠軍等等。即使最後離隊時不算太過愉快，但朗尼仍然係唔少魔迷心目中嘅傳奇。
阿仙奴 － 亨利(176球)
1999年，亨利於轉投祖雲達斯半季後就被雲加收購成為兵工廠嘅一員，相信亨利為唔少阿迷喜歡球隊嘅原因之一。呢位法國射手於1999-2007年期間共為阿仙奴攻入175個入球，於11/12年球季回歸時亦為球隊交出1個入球。於效力兵工廠期間，亨利曾4次當選英超神射手，為球隊帶來2座英超獎座及3屆足總盃冠軍。
利物浦 – 科拿(128球)
六隊之中，紅軍嘅歷史射手為當中最為久遠嘅一位。科蘭於93年開始為利物浦一隊上陣，於2001年尾轉投列斯聯，其後被賣到曼城後再度回歸紅軍。於科蘭效力嘅11個球季當中，呢位射手共為球隊攻入128球，可惜都未能為利物浦帶來聯賽冠軍寶座。
車路士 – 林伯特(147球)
藍戰士歷來英超最佳神射手正正為現時的領隊 － 林伯特。呢位英格蘭中場球員雖然於國家隊生長於「雙特年代」未算有太大成就，但其為車仔效力嘅13個球季就為球隊交出147個聯賽入波，為BIG6歷史射手當中唯一嘅中場球員。林伯特於球員生涯曾為車路仔帶來3座英超冠軍及1次歐聯，車迷都期待其領隊生涯會為球隊帶來更理想嘅成功。
曼城 － 阿古路(172球)
阿古路可算係藍月亮堀起嘅最具代表性球星之一。現年三十一歲嘅阿古路於2006年由馬體會轉投曼城至今，一共為球隊交出172個英超入球，多年來都為英超射手前三名，並為曼城贏得4次英超冠軍及4次聯賽盃，於餘下日子相信該阿根廷會全力為球隊衝擊歐聯，並將入球記錄繼續拉開。
熱刺 – 哈利簡尼(130球)
除阿古路外，簡尼為另一位仍然效力「BIG6」嘅球隊歷史射手。自2012年為一隊上陣至今，呢位英格蘭頂級射手共為熱刺攻入130個英超入球，並分別於15/16及16/17球季成為英超神射手。哈利簡尼為熱刺目前尚未贏得任何重要錦標，但其對球隊嘅重要性不言而喻。熱刺想於未來保持競爭力，於轉會窗必須盡力留住呢位當家射手。
