多間外國媒體報導，巴塞近日為尼馬開出嘅報價再遭到PSG拒絕，該法甲班霸仍然企硬2.22億歐元嘅標價。
據報是次巴塞開出嘅報價高達1.5億歐元，以分期形式支付，並同時將拉傑迪及丹比利加入交易之中，而「地上最強」於開出報價時曾堅信此報價可以直接將尼馬帶回魯營。
就PSG而言，尼馬場內場外紀律欠佳，加上傷病史太多，球會已不再如此往般視該巴西球星為不可或缺嘅一員。話雖如此，PSG目前仍然有一個非常堅定嘅立場 – 未能收回當初購入尼馬嘅2.22億歐元絕不放人。
除此以外，巴塞所提出嘅兩位球員都希望留隊，當中丹比利更曾明言想繼續於魯營效力，此問題亦會成交易另一阻力。
早前曾被指對尼馬有興趣嘅為另一支西甲班霸皇家馬德里，不過外媒指由於轉會費太過高昂，銀河艦隊已於是次爭奪戰中退出。
歐洲嘅轉會窗於9月2日就會正式關閉，巴塞是否願意於短期內再次提高報價以滿足PSG要求或會成未來數天嘅關鍵。
